ලොතරැයි ජයග්‍රහණයට ජ්‍යෝතිෂය ඉවහල් වෙයිද?

පොහොසතුන් වීමට මිනිසුන් තුළ ඇත්තේ නොසන්සිඳෙන ආශාවකි. පෙර කාලයට වඩා අද ප්‍රබලව නැගී සිටින වෛවර්ණ වෙළෙඳ ලෝකය විසින් මිනිසා මුදල් පසුපස හඹා යන නරුමයෙකු බවට පත්කර ඇතැයි කීවොත් නිවැරදිය. කිසිදු ආගමකින් මුදල් ඉපයීම වත් පොහොසත්කම් ඇති කෙනෙකු ලෙස ජීවත්වීම නරක දෙයක්‌ ලෙස පෙන්වා දී නැත. බුදු සමය මුදල් ඉපයීමේ නිවැරදි ක්‍රම එම මුදල් වැය කළ යුතු නිවැරදි ක්‍රම මැනවින් දක්‌වා ඇත.

වර්තමාන මිනිසා ආගම නීතිය සදාචාරය යන සියල්ල බල්ලාට දමා මුදල් සොයන තැනට පත්ව තිබේ.

අද බොහෝ දෙනකුට අවශ්‍යව ඇත්තේ ඉක්‌මනින් පොහොසතකු වීමටය. ඒ සඳහා නොකරන නීච ක්‍රියාවක්‌ අද සමාජය තුළ නැති තරම්ය. නීච ක්‍රියා කිරීමට අකමැති අය විවිධ දේව පූජා ස්‌තෝත්‍ර ගායනා පහන් දැල්වීම් වාලම්පුරි විවිධ යන්තර මන්තර භාවිත කිරීම් පින්තූර, ලාෆිං තඩ්ඩා (කාට බුද්ධා වුවත් ඒ වාමන රුව මට නම් බුද්ධා නොවේ) ගෙම්බා ඇතුළු තවත් විවිධ උපකරණ නිවසේ හෝ ව්‍යාපාරික ස්‌ථානයේ තබාගැනීම් ආදී බොහෝ ක්‍රියාකාරකම් කරන බව පෙනෙන්නට ඇත.

මාධ්‍ය ඔස්‌සේ විවිධ වේශයෙන් පෙනී සිටිමින් ධනය වැඩිකර ගැනීමේ ක්‍රම සහ විධි කියා දෙන අයගේ දැන්වීම්, සාකච්ඡා ආදිය නහුතයකි.

යම් යම් ප්‍රශ්නවලට මගෙන් උපදෙස්‌ ලබා ජය ගත් අයෙක්‌ පසුගිය දිනෙක මා අමතා තමාට විශාල මුදලක්‌ අවශ්‍ය වී ඇති බවත් ලොතරැයි දිනුමක්‌ ලබා ගැනීමට මග කියා දෙන ලෙසත් ඉල්ලා සිටියේය. එසේ කළ හැකි බව දැක්‌වෙන දැන්වීම් මාධ්‍ය තුළින් තමා දැක ඇති බව තවදුරටත් කීවේය.

එසේ දිනුම් ලැබීමට හැකි නම් දැන්වීම් දමන අය විශාල දිනුම් තමාටම ලබා නොගන්නේ මන්දැයි මම පෙරළා ඇසීමි. එසේ කළ හැකි නම් මම ද සියලුම විශාල දිනුම් ලබා ගන්නා බවද පැවසීමි. ඔහු කාරණය තේරුම් ගත්තේය.

විශාල මුදල් දිනුමක්‌ ලැබීමට නම් ඒ පුද්ගලයා ඊට අදාළ කුසල කර්ම සහිතව (ග්‍රහ පිහිටීම් ඇතිව) උපත ලබා තිබිය යුතුය. නියමිත දින අදාළ ග්‍රහයන්ගේ දශා අතුරු දශා විදශා ලබා තිබිය යුතුය. එදින ග්‍රහ ගෝචරය ඒ සඳහා ගැළපිය යුතුය. දිනුම ලබන්නාගේ මව් පිය අඹු දරු ආදී සමීපතමයන්ට ද පෙර කළ කුසල් ඇත්තන් විය යුතුය. (අදාළ මුදලින් පල ලැබීමට වාසනාව ඇත්තන් විය යුතුය) මේ සියල්ල සපිරි කල්හි කෙනෙකුට විශාල මුදලක්‌ හදිසියේම ලැබෙනු ඇත. එසේම විශාල මුදල් ලැබීමක්‌ කෙනෙකුගේ හෝ එම පවුලේම හෝ විනාශයට හේතුවන අවස්‌ථා ද තිබෙන බව මතක තබා ගත යුතුය.

ලොතරැයි ටිකට්‌ මිලදී ගැනීමට සුදුසු හෝරා ජ්‍යෝතිෂ පොත පතෙහි දක්‌වා ඇත. එම කාල හෝරාව තුළ ලොතරැයි පත් මිලට ගත් පමණින් තමාට දිනුමක්‌ ලැබේය යි සිතතොත් එය මුලාවකි. මේ හෝරා දක්‌වා ඇත්තේ දිනුමක්‌ ලැබීමට සුදුසුකම් ඇති අයට තවත් පිටිවහලක්‌ ලබා ගැනීම සඳහාය. එබැවින් ලොතරැයි මිලට ගන්නා අය කව්රුන් හෝ වේවා මෙම හෝරාවන් භාවිත කළාට ඇති වරදක්‌ නැත. මෙහි හෝරාවන් දක්‌වා ඇත්තේ උදේ 6 ට හිරු උදාවෙතැයි උපකල්පනය කොට ගෙනය. හිරු උදාවන වේලාව වරින් වර වෙනස්‌ වේ. අදාළ හෝරාව ද ඒ අනුව සකස්‌ කර ගත යුතුය. මාධ්‍ය ඔස්‌සේ දිනපතා හිරු උදාව ඔබට දැන ගැනීමට හැකි වනවා ඇත.

උදේ 10-11 සුබ හෝරාව ලෙසදක්‌වා ඇති කල්හි එදින හිරු උදාව 6.20 ට වූයේ නම් සුබ හෝරාව උදේ 10.20 - 11.20 වනවා ඇත.

ලග්නය දිනය සුබ හෝරාව

මේෂ සෙනසුරාදා දවල් 11 - 12

සවස 6 - 7

වෘෂභ බ්‍රහස්‌පතින්දා උදේ 10 - 11

සවස 5 - 6

මිථුන අඟහරුවාදා උදේ 9 - 10

සවස 4 - 5

කටක සිකුරාදා උදේ 7 - 8

සවස 2 - 3

සිංහ බදාදා උදේ 6 - 7

දවල් 1 - 2

රාත්‍රි 8 - 9

කන්‍යා සඳුදා දවල් 12 - 1

රාත්‍රි 7 - 8

තුලා ඉරිදා උදේ 8 - 9

සවස 3 - 4

වෘශ්චික බදාදා උදේ 6 - 7

දවල් 1 - 2

රාත්‍රී 8 - 9

ධනු සිකුරාදා උදේ 7 - 8

සවස 2 - 3

මකර අඟහරුවාදා උදේ 9 - 10

සවස 4 - 5

කුම්භ බ්‍රහස්‌පතින්දා උදේ 10 - 11

සවස 5 - 6

මීන සෙනසුරාදා දවල් 11 - 12

සවස 6 - 7

මේ අනුව ඔබට තම ලග්නයට හිමි දිනය සහ හෝරා මතක තබාගෙන ලොතරැයි පත් මිලට ගැනීමට හැකිවේ. එහෙත් තම අතේ ඇති මුළු මුදලින්ම ලොතරැයි පත් මිලට ගැනීම වැනි අනුවණකම් නොකළ යුතුය. ජාතික ලොතරැයි මණ්‌ඩලයට අනුබද්ධිතව ඉතා විශාල පිරිසක්‌ ජීවිකාව කර ගන්නා නිසාත් ලොතරැයි මුදලින් විවිධ සමාජ සේවා කෙරෙන නිසාත් නොසිතූ මොහොතක තමනට ද වාසනාව ළඟාවිය හැකි නිසාත් මසකට වරක්‌ දෙකක්‌ ලොතරැයි පතක්‌ මිලට ගැනීම යහපත් බව කීමට හැකිය.

අනෝමා පී. ඈපා සෙනෙවිරත්න